Адвокатот Љубомир Михајловски – Џанго од вчера е нов претседател на Адвокатската комора на Република Македонија. Негови заменици ќе бидат Јелена Ристиќ и Бесим Реџепи.
Љубомир Михајловски-Џанго на јавноста и е познат како поранешен министер за внатрешни работи која ја извршувал од 17 декември 2004 до 26 август 2006.
– Мојата првенствена заложба е да ја држам адвокатурата и Комората подалеку од политиката. Потоа, да се зајакне квалитетот на адвокатурата преку создавање на законски решенија во интерес на адвокатитите и граѓаните, како и во однос на еднаквата положба на адвокатите во постапките. Во таа смисла, моја заложба ќе биде и учеството на адвокатите во подготовката на прописите бидејќи во таа насока од клучно значење се нивните мислења, предлози и сугестии како бранители на човековите права. Исто така, во работата на АКРМ акцент ќе биде ставен и на континуираната едукација на адвокатите, како и на меѓународната и регионалната соработка на АКРМ. Од големо значење во понатамошниот период е и да се обезбедат подобри услови за работата на Комората – вели новиот претседател на АКРМ за Академик.мк.
За фотелјата претседател на Адвокатската комора се бореа и Звонко Давидовиќ, Наташа Трпеновска Тренчевска, Димитар Панчевски и Александар Тортевски.
Со Адвокатската комора досега претседаваше Никола Додевски, кој првично беше адвокат на функционерите на поранешната власт во случаите на СЈО, вклучувајќи го и експремиерот Никола Груевски.
фото: Академик.мк
