Неопходно е, не заради Брисел, носење нов квалитетен и издржан закон за јавното обвинителство, а не решенија што ќе бидат резултат на дневно-политички договори. Подобро да не се донесе закон, отколку да се изгласа закон со вакви решенија, истакна државниот јавен обвинител Љубомир Јовески во денешното годишно обраќање пред јавните обвинители и пред новинарите.
Тој посочи дека Јавното обвинителство изминатава година беше исправено пред бројни предизвици и покажа неселективност во спроведувањето на законите, а на политичарите и моќниците, како што додаде, им стана јасно дека одлуките не се носат во нечии кабинети, туку нив ги носат обвинителите самостојно.
Тој најави дека поединечно, преку систем за утврдување на резултатите на обвинителите, ќе се оценува работата на секој јавен обвинител.
– На овој начин ќе се евидентира работата и ќе се детектираат слабостите во работењето на секој јавен обвинител, со единствена цел зголемување на ефикасноста во постапувањето – рече Јовески.
Еден од големите предизвици, како што рече тој, беше опасноста предметите од СЈО да пропаднат и затоа донеле одлука за преземање на овие предмети.
– Јавното обвинителство на Република Северна Македонија од СЈО презеде три предмети по кои е донесена правосилна пресуда, два предмета за кои е донесена првостепена пресуда, 20 предмети кои се во фаза на судење, 19 предмети по кои се спроведува истрага, шест предмети кои се во предистражна постапка, 80 други предмети кои се однесуваат на предистражна постапка и дел по барања за воспоставување надлежност, 38 предмети по кои се спроведува финансиска истрага и три предмети по вонредни правни лекови – рече Јовески.
Предметите според нивната итност се прераспределени во надлежните јавни обвинителства и се дадени овластувања јавните обвинители да продолжат со преземањето на дејствијата.
– Имаме проблеми и слабости, но имаме пред сè подготвеност за одговорно и ефикасно справување со криминалот. Дека никој не е над законот покажуваат истрагите кои ги водевме изминатава година. Покренати се постапки и против јавен обвинител, судија, пратеник, службено и одговорно лице – рече Јовески.
Досега се отворени четири истражни центри, и тоа во Основното јавно обвинителство за гонење организиран криминал и корупција и во основните јавни обвинителства во Тетово, Куманово и во Скопје. Тој апелираше до надлежните да имаат разбирање за неопходната финансиска поддршка за да можат истражите центри да станат функционални.
Фото: МИА
