Седницата во Апелациониот суд во Скопје за пресудата во „Тенк“ за ексминистерката Гордана Јанкулоска се одложи бидејќи не дојдоа нејзините адвокати. Боро Тасевски навел дека од приватни причини е спречен да присуствува, а Сања Алексиќ од здравствени.
Судиите ја презакажаа седницата за 25 февруари.
Јанкулоска за набавката на мерцедесот е осудена на шест години затвор од судечки совет во Основниот суд Скопје 1 со кој претседаваше судијката Добрила Кацарска, а ексминистерката и нејзините адвокати поднесоа жалба до Апелација.
Второстепениот суд може да ја потврди пресудата од Основниот суд Скопје 1, да ја преиначи или да го врати предметот на повторно судење. Ако и Апелација ја потврди казната, пресудата ќе стане правосилна и Јанкулоска ќе треба да ја изврши. Меѓутоа, во таков случај ексминистерката би можела да бара и одлагање на извршувањето на казната додека нејзиното бебе не наполни една година (до јуни годинава), што е дозволено според Законот за извршување на санкции.
Заедно со Јанкулоска на обвинителка клупа во овој случај седеа и поранешниот премиер, Никола Груевски, и поранешниот помошник министер во МВР, Ѓоко Поповски, но поради ризичната бременост, за неа постапката се раздвои.
Груевски и Поповски веќе се правосилно осудени: експремиерот на две години, а поранешниот функционер во МВР на четири години и шест месеци. Поповски се наоѓа во затвор, а Груевски избега во Будимпешта, Унгарија, каде и побара азил.
