Влатко Ѓорчев, кој беше еден од потенцијалните кандидати на професорката Гордана Силјановска Давкова во партиската трка за претседателски кандидат ѝ ја честита победата и посакувајќи и добар резултат на изборите на 21 април и 5 мај.
– Ѝ посакувам успех во кампањата и што подобар резултат, затоа што важно е за иднината на Република Македонија опозицијата предводена од ВМРО-ДПМНЕ да има што подобар резултат. Им благодарам на сите 80 делегати кои гласаа за мене, им благодарам на поддршката. Останува во ВМРО-ДПМНЕ заедно да се бориме и продолжуваме заедно во кампањата обединети сплотени и сложни – рече Ѓорчев.
Силјановска победи убедливо со 408 гласа од вкупно 519.
Според него, гласањето на делегатите било демократско.
– Делегатите демократски гласаа, целата постапка беше регуларна и демократска и во ред. Апсолутно стојам на располагање за кампањата, секако мислам дека навистина имаме шанси за добар резултат. Важно е за Македонија да има добар демократски баланс затоа што за оваа власт и гарнитура навистина е добро некој да се спротивстави. Силјановка како претседател ќе може да го направи тоа, ние во парламентот ќе парираме, граѓаните со нивните активности – порача Ѓорчев.
Тој кажа оти агендата на активности ќе го утврди нејзиниот штаб, но рече дека ѝ стои на располагање за овие важни избори.
