Ракометната репрезентација на Шпанија оствари победа против Египет со 36-31 (17-18) во мечот за седмото место на Светското првенство во ракомет во Германија и Данска.
По денешниот триумф, Шпанците си загарантираа место на квалификацискиот турнир за Олимписките игри во Токио 2020.
Двете репрезентации одиграа изедначено прво полувреме и често се менуваа во водство, а „фараоните“ заминаа на паузата со плус еден разлика.
Во второто полувреме Шпанија играше далеку подобро и по првите десет минути прво поведе со +2 (23-21) а потоа дојде и до предност од 4 разлика (28-24). Избраниците на Рибера имаа највисока предност од 7 гола (35-28) а потоа го доведоа мечот до крајот за конечни 36-31.
Најефикасен кај Шпанија беше Кањелас со 9 погодоци, додека кај Египет најдобар беше Ел Ахмар со 6 гола.
Во вториот натпревар за денес, од 20,30 часот играат Хрватска и Шведска во борба за петтото место на Мундијалот.
