Поранешниот директор на БЈБ, Митко Чавков е првиот од обвинетите во случајот за 27 април кој во судница ги кажува неговите завршни зборови. Пред него на изминатите неколку рочишта тоа го сторија обвинителките Вилма Русковска и Ивана Трајчевска, како и адвокатите на сите обвинети.
– Долго размислував дали воопшто да дадам завршен збор или да останам на она што го кажа мојот адвокат – започна Чавков кој неговата одбрана ја даде делејќи ја на два дела, на тоа што се случувало надвор од судницата и на тоа што се случуваше внатре односно на доказите кои беа изведувани.
Чавков забележа дека обвинителството не требало да води посебни случаи туку една и единствена предистражна постапка за 27 април.
– Вистината за 27 април е една и не може да се склопи како мозаик од парцијални истраги – рече обвинетиот.
Тој во неговиот завршен збор зборуваше дека имало големи притисоци и очекувања од јавноста за расветлување на овој случај, а ги посочи политичките противници со нивните изјави во медиумите и одредени медиумски анализи кои преудицирале негова вина. Како пример ги наведе написите со извештаи од ПИ мерките и тоа дека неговиот телефон бил „фатен” на базните станици кај ВМРО-ДПМНЕ, како и објавите со сегменти од сведочењето на загрозениот сведок.
– Целта беше формирање јавно мислење за моја јавна стигматизација – рече Чавков.
Тој кажа дека биле очекувани тенденциите против него од криминалното подземје бидејќи 30 години е дел од полицијата и се бори против нив, но оти не може да ги сфати тенденциите за политички реваншизам.
– Ако во 2002 година со промената на власта цело семејство бевме раздели со распоредување низ различни места на работа, сега бев лишен од слобода- рече Чавков.
Тој како примери за неправеден однос кон него го посочи и тоа дека бил понижуван со негово фотографирање во затворот во Шутка и во судница со лисици на рацете.
Поранешниот директор на БЈБ кажа дека обвинетите имале различен третман, а не го заборави ниту Законот за амнестија кој, како што кажа, бил изгласан речиси со консензус и на власта и на опозицијата. Нарекувајќи го овој закон „врвен аргумент за политичка контаминација на правосудството”, Чавков ја спомена амнестијата и во насока на тоа што со неа било постигнато и гласањето за уставните измени.
Во однос на истрагата за 27 април тој кажа оти кога бил повикан во обвинителството не му биле презентирани факти и докази.
– Јас дадов исказ, но тоа се сведе на исповед бидејќи не ми беа презентирани докази – рече Чавков.
Со ниту еден доказ, посочи тој, обвинителството не докажало директна умисла и сакање за да се изврши кривичното дело. Во настаните околу 27 април тој тврди дека имал проактивна улога, а не бил пасивен. Меѓутоа, како што рече, полицијата има гломазна организација која ја сочинуваат над 250 единици, оддели, одделенија… Меѓу нив се и осумте Сектори за внатрешни работи кои, според Чавков, се непосредно одговорни за безбедноста согласно територијата за која се надлежни. Тој како директор на БЈБ и носител на златна команда, рече, не може да биде одговорен за изведбата на полициската операција на лице место.
– Надлежностите на златната команда се стратешки и златната команда не се меша во носењето на тактичките одлуки на лице место – рече Чавков.
Завршните зборови кој тој ги изнесува повеќе од еден час се уште се во тек.
