Потпретседателката на СДСМ Мила Царовска денеска на прес-конференција ја обвини опозициската ВМРО-ДПМНЕ и нејзиниот лидер Христијан Мицкоски дека продолжуваат да ја замајуваат јавноста заговарајќи укинување, поништување или ревидирање на Договорот од Преспа.
– Договорот од Преспа значи просперитет за државата, а заговарачите против него не си ја сакаат државата. Укинувањето што го најавува ВМРО-ДПМНЕ значи укинување на нашето членство во НАТО, изгубени милијарди евра странски инвестиции, спречување на економскиот развој и осиромашување на граѓаните – рече Царовска додавајќи дека без Договорот од Преспа нема перспектива во ЕУ за нас.
Според неа, фактот што Мицкоски и ВМРО-ДПМНЕ продолжуваат да заговараат укинување на Договорот од Преспа е јасен показател дека не ја гледаат нашата држава во НАТО и ЕУ и не се заинтересирани за развој на економијата и овозможување на подобра иднина за младите.
На прес-конференцијата таа потсети на искуството со ембаргото и блокадите од Грција, но исто така потенцира дека лани Грција стана наш трет стратешки партнер во трговската размена со вкупна вредност од една милијарда американски долари, а солунското пристаниште ни е главната врска со светот од која сме економски зависни.
Во однос на почитувањето на Договорот од Преспа, Царовска рече дека најновото замајување е од техничката министерка за труд и социјална политика, која, како што кажа, „глуми дека го враќа поранешното уставно име, иако потпиша „ќе го почитувам Уставот и законите на Република Северна Македонија“.
