Мојот аргумент е: „да им дадеме шанса и да почнеме, бидејќи со денешниот степен на несигурност, никој не може да го предвиди траењето на процесот“, вели премиерот на Хрватска Андреј Пленковиќ во интервјуто на „Јуроњуз“ на грчки јазик, коментирајќи ја европската перспектива на Северна Македонија и Албанија.
– Нашата амбиција е да разговараме со оние кои се уште не се убедени и да им кажеме дека е подобро за стабилноста на регионот, подобро за европската иднина на нашето соседство, да започнат пристапните разговори. Мојот аргумент е „да им дадеме шанса и да почнеме, бидејќи со денешниот степен на несигурност, никој не може да го предвиди траењето на процесот“ – вели Пленковиќ.
Хрватскиот премиер, говорејќи за последниот Самит на ЕУ кога не беше одреден датум за пристапни преговори за Македонија и Албанија, рече дека и двете земји направиле многу во однос на потребните критериуми и „затоа Европската комисија, како и во случајот со Хрватска со шенген-зоната, рече дека сега е вистинското време за отворање пристапни преговори“. Паралелно, се обиде да ги објасни и причините за недоделувањето датум.
– Мислам дека има многу причини. Меѓу нив е и анализата од некои земји-членки во извештајот за оценката, односно прашањето дали беа доволно подготвени, дали беа прецизни или не. А другата беше поопшта дискусија за процесот на проширување и дискусија за подобро функционирање на Европската Унија, како што е денес, ЕУ-28, рече премиерот на Хрватска во интервјуто за „Јуроњуз“ на грчки јазик.
