Обвинителката Фатиме Фетаи во изјава за медиумите, денеска пред Основниот кривичен суд, рече дека изјавата на поранешниот разузнавач дека „бомбите“ претрпеле модификации и биле компромитирани, не може да влијае на постапките во предметите кои ги отвори СЈО ниту пак на автентичноста на материјалите.
– Видете во овој момент се работи за исказ кој уште не е довршен, Верушевски минатиот пат беше испрашуван само од обвинителството, доправа следува негово испрашување вкрстено од страна на одбраната, а на крај судот си има право да поставува прашање од појаснувачки карактер. Читав и по медиумите дека господинот Верушевски дал некоја изјава дека материјалите претрпеле некоја модификација, но толкување, појаснување, за тоа може да даде само тој. За нас како обвинителство, автентичноста на материјалите воопшто не беше спорна и не е спорна ниту за тие сведоци кои на почеток примија некои материјали, ниту, пак, тоа го спорат обвинетите во судските постапки. Имаше на почетокот пред да почнеме со судења, изјави на ТВ дека материјалите се сечени, лепени, монтирани, но никој тоа досега не го кажал во судница. И од друга страна се работи за докази кои не се изолирани докази во нашите постапки туку се поткрепени со други докази – рече обвинителката Фетаи која сега е дел од ОЈО Скопје.
