Националното биро за цивилна заштита на Хрватска соопшти дека се потврдени уште два случаи на лица заразени со коронавирусот, јави дописникот на МИА.
Според министерот за здравство на Хрватска Вили Берош се работи за луѓе кои се блиски и биле во непосреден контакт со веќе заразените во Загреб и Ријека.
Првиот пациент кој е помладо лице кое е хоспитализирано во Загреб, а вториот заразен е повозрасен маж и веќе се наоѓа во болницата во Ријека.
Тоа што е добро според хрватските здравствени власти е дека новозаболените лица веќе биле во карантин откако е констатирано дека контактирале со заразени лица, а на тој начин е избегната можноста тие да заразиле други луѓе.
Приватното средно училиште во кое учат децата на 40-годишната жена од Атина, заразена со коронавирусот, денеска е превентивно затворено, јави дописничката на МИА од Атина.
Од „Колеџ Атина“, соопштуваат дека по наредба на министерката за образование и по препорака на Националната организација за јавно здравје, училишните единици за средно образование, како и градинката денеска ќе бидат затворени, од превентивни причини.
Грчките медиуми објавија дека со 40-годишната, на патувањето во Италија, каде што и се заразила со вирусот, била и нејзината ќерка, која веднаш по враќањето во Атина, заминала на екскурзија во Лондон.
