Обвинет во издвоена постапка за несреќата кај Ласкарци призна вина пред судот и доби условна казна затвор од 2 години, ако во наредните 5 не го повтори делото.
Судијката Славица Андреевска го осуди гостиварецот со иницијали В.Г. за несовесно работење, бидеќи, иако знаел дека има вграден уред за лажирање на брзината во автобусот на „Дурмо Турс“, издал потврда за извршена проверка со образложение: „И покрај тоа што пломбата која го спречува неовластеното отварање на куќиштето на тахографскиот уред била оштетена и постоел вграден уред за манипулација на реалната брзина која ја бележи тахографот, обвинетиот издал потврда дека проверката е извршена“.
– „Обвинетиот делото го сторил на 05.01.2018 година, што укажува за безобѕирноста и начинот на кој функционирал превозникот „Дурмо турс“ и „Автомото Здружението Гостивар“. Не само што сами на себе дефакто си вршеле контрола на исправноста на превозните средства – автобусите, туку имале и овластување и тахографските уреди во автобусите кои сами ги манипулирале, истите врз основа на ова решение да ги оценат дали се исправни или не. Меѓутоа, и покрај тоа што оваа работа заради која што сега одговара обвинетиот, можеле сами да ја завршат, му ја доделиле на обвинетиот, тој да ја заврши и да ја „аминува“ исправноста на тахографскиот уред, пишува во пресудата.
Обвинителот на рочиштето рекол дека причината поради која обвинетиот го направил делото не се 2.500 денари колку што наплатил, туку ситуацијата во која што бил доведен, односно ќе се соочел со последица неговата работилница да биде затворена.
Во несреќата кај Ласкарци, загинаа 16 лица, а над 30 беа повредени.
Фото: EPA/Frosina Novakovic
