Трите деца кои вчера беа префрлени во друг дом, веќе се вратени во Малиот групен дом во Визгебово. Засега нема никаква закана по нивниот живот, изјави денеска министерката за труд и социјална политика, Мила Царовска.
Според неа, дали Домот ќе се дислоцира како што бараат дел од жителите во Визбегово, допрва ќе се одлучува, зашто дискусијата е во тек, но во секој случај, ќе се бара заедничко, компромисно решение.
– Децата викендот го поминаа на гости кај свои пријатели, исто така поддржани од Министерството. Си се враќаат сега на редовните школски активности и дневното живеење. Сепак, не сакавме да ги слушаат зборовите на населението зашто не бевме сигурни што сѐ ќе биде кажано. Тие деца доволно долго во животот биле изложени на одредени негативни појави и однесувања од нивните семејства и заедниците, затоа сакавме да ги заштитиме. Дискусијата за дислокација на Домот трае. Очекувам позитивен фидбек на населението, посебно што посебен дел го поддржува Групниот дом и тоа го видовме од вчерашните настани, како и од првите соседи кои кажаа нешто сосема спротивно од групата. Групите имаат можност за различни мислења, но важно е мнозинството и тоа како ќе дојдеме до одредено компромисно решение – нагласи Царовска, одговорајќи на новинарски прашања по презентацијата на успешните бизнис приказни со самовработување во Фондот за иновации.
Во врска со забелешката на некои жители од Визбегово дека воспитувачите не се грижат доволно зашто доцна навечер децата излегувале од Домот и шетале низ населбата, Царовска е децидна.
– Малите групни домови не се затвор. Тие се од отворен тип. Овие деца се соочувале со социјални ризици со кои поголем дел од нас не се соочиле никогаш во животот. Службите не само што се присутни, туку се таму 24 часа. Тоа е проверено од сите инспекциски служби во Министерството. Но, поддршката од заедницата е најважна во овој момент. Во Скопје вакви домови има многу, не е само овој во Визбегово. Може да се случи некое дете да ја напушти куќата во одреден момент, но важно е за колку време ќе се врати, каде било, што ќе се преземе и тоа се прави. Системот на социјална заштита нуди поддршка, па има простор за грешка, па пак поддршка, сѐ додека не престанете да правите грешка. Значи, овие институции се отворени и никогаш нема да станат затворени зашто тие се викаат затвор, а не мал групен дом – потенцира министерката.
Таа изрази верба во, како што рече, силата и мудроста на нашиот народ и во разумот.
– Како што покажавме во Тимјаник дека доаѓаме до заеднички решенија, така ќе покажеме и во Визбегово. Навистина очекувам дека во наредниот период сите заедно, и населението во Визбегово и ние како институции, ќе покажеме дека можеме да им понудиме отворена рака, отворена прегратка и дека заеднички можеме да го подобриме нивното живеење. Се надевам дека со тоа ќе покажеме успех и отвореност и за другите прашања во општетството на кои се гледа со стигма и дискриминација и дека ќе можеме да ги надминеме – рече Царовска.
