Американскиот претседател Доналд Трамп најави дека ќе го именува Патрик Шанахан за нов министер за одбрана.
Шанахан, поранешен директор на „Боинг“, на таа функција се наоѓа од 1 јануари како вршител на должност.
– Вршителот на должност Шанахан изминатите неколку месеци покажа дека е повеќе од квалификуван да го води Министерството за одбрана и продолжи одлично да ја извршува таа работа – изјави портпаролката на Белата куќа, Сара Сандерс.
Шанахан рече дека е почестен од објавата на претседателот Трамп. Тој додаде дека, доколку неговиот избор биде потврден, „ќе продолжи со агресивната примена на националната стратегија за одбрана“.
Тој на функцијата го замени Џејмс Матис, кој поднесе оставка, како причина наведувајќи ги политичките разлики.
Шанахан (56) додека беше на функцијата вршител на должност министер за одбрана се фокусираше на примена на националната одбранбена стратегија развиена за време на мандатот на Матис, која го нагласува преминувањето од тактиката и ресурсите потребни за водење мали војни против екстремистичките групи на она што го нарекува натпревар со „големите сили“ – Кина и Русија.
Ова е трет пат во историјата на САД Пентагон да го води вршител на должност министер.
ФОТО: EPA / SHAWN THEW
