Американската амбасада во Ерусалим беше отворена денес, а тој потег предизвика масовни протести на Палестинците и страв од поголеми нереди.
– САД денес и служебно ја отвараат својата амбасада во Ерусалим – потврди Давид Гридман, американскиот амбасадор во Израел.
Претходно во текот на денот, израелската војска уби најмалку 38, а рани повеќе од 1700 Палестинци за време на немирите на гранцата помеѓу Израел и Појасот Газа.
На отварањето не присуствуваше Доналд Трамп, наместо кој пристигнаа ќерката и зетот на претседателот, Иванка Трамп и Џаред Кушнер.
Трамп на присутните им се обрати преку видео врска.
– Долго чекавме на овој момент, бидејќи Израел го одреди Ерусалим за главен град уште во 1948 година, по создавањето на државата. Израел е суверена нација која како и секоја друга држава има право да одлучи кој град ќе биде нивен главен град. Реалноста е дека Ерусалим е нивниот главен град и ние го признавме. Денес одиме чекор понатаму со отварањето на амбасада во Светата земја – рече Трамп.
– Наша најголема надеж е мирот, САД се целосно посветени на одржување долгорочен мировен договор и отстранување на статусот кво од светото место. САД секогаш ќе бидат сојузници на Израел во потрагата по слобода и мир. Со овој чин е потврдено пријателството кон Израел, Палестинците и сите соседи – додаде американскиот претседател.
