Претседателот на ДПА, Мендух Тачи има најмногу отсуства во Собранието, изминатите шест месеци, Тачи таму се појавил само еднаш. Има 77 отсуства, никогаш не зел збор на пленарна седница и во работните тела, не поставил ниту едно пратеничко прашање и не гласал за ниту еден закон, покажува извештајот „Мојот пратеник“, јави Алсат.
Исти податоци, но со помалку отсуства има и поранешниот премиер, Никола Груевски. Во актуелниот мандат како пратеник Груевски се појавил само еднаш во второто шестмесечје од 2017-та, има 68 отсуства, ниеден збор на пленарна седница и во работните тела, каде во едно од нив е и член, не поставил ниедно пратеничко прашање и не гласал ниеден закон.
Во групата на Груевски и Тачи влегува и пратеникот на ВМРО-ДПМНЕ, Борис Змејковски. Во периодот јули-декември 2017-та во Собранието тој се појавил само два пати, има над 50 отсуства, ниеден збор на пленарна седница, ниедно пратеничко прашање и ниеден глас за некој закон или амандман.
Од пратеничките во овој парламентарен состав, на колегите најмногу им недостигале Мерале Узеири-Ферати од ДПА и Магдалена Манаскова од ВМРО-ДПМНЕ. Пратеничката Ферати за 6 месеци се појавила 27 пати во Собранието, но никогаш не побарала збор на пленарна седница, не гласала за ниеден закон и амандман и не поставила ниту едно пратеничко прашање.
Во меѓувреме, пратеничката на ВМРО-ДПМНЕ, Магдалена Манаскова им недостигала на колегите околу 70 пати, не говорела никогаш на пленарна седница, не поставила ниедно пратеничко прашање. Манаскова и покрај тоа што е членка во две комисии има само едно учество, а податоците сведочат дека поднела 14 амандмани. Таа не оправдала 5 отсуства.
Наспроти пратеничката Манаскова и пратеничката Ферати, пратеничката на СДСМ, Фросина Ременска, ја држи штафетата како најактивна народна избраничка. Од пратениците, најзборлив е Илија Димовски од ВМРО-ДПМНЕ, а по него е Томислав Тунтев од СДСМ, па Фадил Зендели од Движењето Беса и Артан Груби од ДУИ.
