По бегството на поранешниот премиер Никола Груевски, СЈО и судот треба сериозно да размислат и за останатите лица кои се обвинети и осудени, а кои се на слобода како Гордана Јанкулоска и Миле Јанакиески, рече министерот за внатрешни работи Оливер Спасовски во гостување во емисијата „Само Вистина” телевизијата Канал 5.
Тој посочи дека осудениот Груевски треба да биде екстрадиран во Македонија и да си ја одлежи затворска казна.
– Единствено што сметам дека е исправно е Груевски да биде екстрадиран и да се одбие барањето за азил. Тоа се очекувањата на сите граѓани. Дали Унгарија треба да е држава која ќе прима криминалци од високи структури на власта. Ова треба да биде сериозна опомена до обвинителството и судот, и МВР. Ги имаме и Јанкулоска и Јанакиески кои се исто така на слобода – рече Спасовски.
Министерот демантира дека постои договор со Груевски и ВМРО-ДПМНЕ.
– Ако имаме договор со било кој можевме да се договараме и можевме да имаме полесно трансферирање на власта, а немаше да се случи ни 27 април, додаде министерот.
