Директорот на основното училиште „Коле Канински“ во Битола, Зоран Мирчевски, потврди дека го суспендирал работникот Ј.Т., служител-хигиеничар во тамошното училиште поради физички напад врз ученик од деветто одделение.
Јавно го осудуваме овој настан, а служителот е суспендиран, посочи Мирчевски.
– Физичкиот напад од служителот врз ученикот се случи викендов, во саботата, кога во училиштето се организираше наставен ден. Како образовна установа веднаш ги презедовме сите мерки, ја известивме полицијата и државниот просветен инспекторат, а повредениот ученик беше однесен во Клиничка болница-Битола на преглед. Очекуваме институционално расветлување на овој настан – рече Мирчевски.
Од СВР-Битола потврдуваат дека настанот се случил во објектот на училиштето и е регистриран по пријава на родителите на ученикот кој бил физички удрен од служителот кому веќе му е поднесена прекршочна пријава за нарушување на јавниот ред и мир, додека пак од Клиничка болница-Битола информираа дека ученикот А.С. роден 2003 година, по укажаната лекарска помош во одделението за максило-фацијална хирургија е пуштен на домашно лекување.
