Судскиот совет го осудува однесувањето на адвокатот Јовица Страшевски – бранител на поранешниот градоначалник на Општина Гази Баба, во случајот ТНТ, кој јавно им се заканува на судијата-поротник, претседателот на Основниот кривичен суд Скопје и на претседателот и членовите на Судскиот совет.
„На овој начин, адвокатот Страшевски покрај улогата на бранител, настојува да ја менаџира постапката во случајот ТНТ, да ја превземе и улогата на судија, спротивно на принципот на владеење на правото чиј сегмент е и принципот на судење во разумен рок. Судскиот совет не може да се меша во менаџирањето со предметите, но е заинтересиран постапките да се завршат без одовлекување во разумен рок“, се наведува во денешното соопштение од Судскиот совет.
Оттаму информираат дека барањето на претседателот на Основниот кривичен суд Скопје за продолжување на мандатот на судија-поротник било ставено на дневен ред на 328-та седница на Судскиот совет од 25.12.2019 година.
„Дел од точките од дневниот ред беа одложени за 30.12.2019 година. Поради немање кворум за одлучување и потребата материјалите да бидат доставени на увид и проучување на новоизбраниот член на Советот, седницата се одложи за 27.01.2020 година“, се додава во соопштението објавено на веб-страницата на Судскиот совет.
Претходно Министерството за правда апелираше сите носители на јавни овластувања во судските постапки – судиите, адвокатите, обвинителите да го почитуваат законот, а доколку дојде до негово прекршување – тоа да биде санкционирано. Апелот уследи откако претседателот на Основниот кривичен суд Скопје, Иван Џолев побара од Адвотатската комора, МВР и Обвинителството да преземат соодветни мерки и да ги истражат елементите на закани и притисоци упатени кон судот и судијата – поротник, во однос на изјавите на дел од адвокатите во предметот на јавноста познат како ТНТ.
„Министерството за правда во изминатиов период работеше на усогласување на законската рамка за независно, непристрасно и ефикасно судство. Очекуваме сите фактори во сферата на правосудството, судовите, Судскиот совет, Адвокатската комора, Јавното обвинителство, Советот на јавни обвинители, да работат согласно законите со цел да се врати довербата во правосудниот систем“, се наведува во реакцијата од Министерството за правда.
Единствено судски постапки, како што посочуваат од Министерството, кои се водат во разумен рок со почитување на правата на обвинетите, судски постапки во кои не се злоупотребуваат процесни права и судски постапки во кои судиите судат врз основа на утврдени докази, а не под притисок на кој било може да резултираат со судски одлуки кои ќе бидат основа на градење на систем заснован на правда.
„Од тие причини, апелираме сите носители на јавни овластувања во судските постапки – судиите, адвокатите, обвинителите, да го почитуваат законот, а доколку дојде до негово прекршување – истото да биде санкционирано. Министерството за правда досега не коментираше актуелни судски постапки и останува на тој став, почитувајќи го принципот на немешање на извршната во судската власт“, стои во реакцијата од Министерството за правда.
