Студентите по медицина на Универзитетот во Тетово ќе можат дел од едукацијата да ја поминат во Градската општа болница „8-ми Септември“ во Скопје согласно заложбите на институциите да се отворат здравствените установи за кадарот без оглед каде студираат, најавија денеска министерот за здравство Венко Филипче и деканот на Тетовскиот медицински факултет, Кастриот Хаџиреџа на денешната нивна средба.
Пристапот за студентите до тие болници, според нив, е повеќе значаен.
– Со тоа за прв пат студенти ќе можат да се едуцираат во таа болница, што е една голема придобивка, врвни експерти по одредени специјалности да ги обучуваат, со што студентите ќе ги надградат знаењата, а воедно тие искуства во иднина ќе значат подобра услуга и за пациентите – рече Филипче.
На новинарско прашање до каде е унапредувањето на другите услови за студирање на студентите од Медицинскиот факултет кои пред неколку месеци протестираа, деканот со одговор дека за дел од барањата веќе се работи на конкретни проекти.
– Некои прашања како отворање студентски дом, менза и слично се надминати. За дел од барањата треба да се координирам со Министерството за образование и наука – рече деканот Хаџиреџа.
Министерот Филипче на Медицинскиот факултет по повод Светскиот ден на здравјето присуствуваше на предавањето на професорот д-р Фадиљ Градица насловено „Универзална здравствена покриеност-За секого и секаде“. Пред студентите и академскиот кадар, покрај предавачот се обратија министерот и деканот.
