Документите кои што се јавно достапни јасно укажуваат дека само со хибриден режим е можно семејство на министер, директор на државна Клиника и приватна фирма која што инкасира речиси 8 милиони евра од министерството можат заедно да имаат имот и да градат 5 касарни на Водно и за тоа ниту една државна институција да не реагира, обвини денеска на прес конференција Наум Стоилковски, портпарол на ВМРО-ДПМНЕ.
– Министерот Филипче призна дека семејството на неговата сопруга заедно со директорот на клиниката и нивниот бизнис партнер поседуваат над 15.000 м2 на Водно. Во Шпанско село не само што во моментов се градат две касарни, туку уште 3 такви се предвидени за градба. Ниту Филипче, ниту неговиот директор не постапиле согласно Законот за спречување на корупцијата и судирот на интереси и Законот за Јавните набавки во делот на судир на интереси. Министерот призна дека лично склучил договор за јавна набавка со фирмата „Синерџи“ фирма на неговиот партнер во Шпанско село 2, тој се јавува како сосопственик во Шпанско Село 2 заедно со директорот и со семејството на Филипче. И сега заедно инвестираат. Ниту пак директорот не постапил согласно овие два закони и потпишал договор за јавна набавка со „Синерџи“ – истакна тој.
Министерот за здравство Венко Филипче и денеска повтори дека се лажни обвинувањата против него од опозициската ВМРО-ДПМНЕ за нелегално стекнат имот и најави можност да поднесе тужба.
-Тоа се класични лажни вести. Ништо од тоа не е вистина, ниту дека имам некаков имот, ниту дека некој фигурира како сопственик. Навистина го поминаа мојот голем праг на толеранција и ќе мора да ја разгледам можноста да поднесам тужба – рече Филипче на денешната прес-конференција, во врска со обвинувањата од ВМРО-ДПМНЕ за т.н. „Шпанско село 2
Стоилковски објави нови докази од кои што, како што рече, ќе се види можноста со купопродажните договори да биле измамени продавачите, а оштетени се и буџетите на град Скопје и на општина Карпош.
– Видно од сите купопродажни договори е дека инвеститорите купуваат ниви по цени од 10 до 25 евра по м2, иако за селото Нерези уште во 2014 година е донесен општ акт за село и согласно член 12 од Законот за просторно и урбанистичко планирање „Катастарската парцела претставува градежна парцела“ па оттаму уште од 2014 година ова земјиште е градежно земјиште – рече тој и го прикажа Урбанистичкиот план од 2014 година, јавно објавен на Веб страната на општина Карпош.
Имајќи ја предвид купопродажната цена од договорите за купување на имотите, на плацевите дел од Шпанско село 2, се отвора сомнеж дали постои измама пред се на продавачите на парцелите кои потоа партнерски се купуваат, но и на даночното одделение на Град Скопје, каде што се пријавува имот како ниви иако знаеле за урбанистичкиот план, а потоа и во 2017 година и сами финансирале АУП во кој што се нацртани 5-те касарни наречени од народот?- рече Стоилкоски.
Според него, пазарната цена на градежното земјиште која, како што вели, сами ја утврдиле во договорот за физичка делба на една катастарска парцела е 60 евра или од 100 до 150% поголема од онаа во договорите за купопродажба.
– Вистинската пак пазарна цена може да се види од официјалниот државен регистер на цени кој што го води Агенцијата за катастар на недвижности. Видно е дека цената за 1 м2 градежно земјиште во Нерези во делот каде што и е Шпанско село 2 достигнува до 115 евра за 1 м2 – тврди Стоилковски и прашува за колку пари се оштетени поранешните сопственици на овие парцели?
– За колку пари е оштетен Буџетот на Град Скопје и Буџетот на општина Карпош по основ на данок на промет на недвижности? Ќе сноси ли некој одговорност и за тоа? Од тука продолжуваме и со оние прашања на кои што досега нема одговор. Како е можно со чесна плата да се дојде до над 15.000 м2 парцели на Водно? Дали се градат старечки домови по средбата со Боки 13 наместо семејни куќи како што е истакнато на онаа табла на градежниот плац во моментов? Ќе изникне ли Шпанско село 2 на Водно пред очите на институциите и воопшто некој да изреагира? Постои ли уште некој близок до министерот Венко Филипче што има имот на Водно во близина или во склоп на Шпанско село 2? Одговори мора да има и ќе има по изборите на 12-ти април – рече Стоилковски.
