Вчерашното невреме и поплавените ниви, дворови и подрумски простории во неколку куќи во Стајковци повторно го актуелизира проблемот на несоодветното решение на обиколницата и каналот за наводнување во овој дел од општина Гази Баба.
Од општината велат дека вчера имало мало излевање на вода од каналот и биле поплавени неколку ниви, а во Стајковци биле поплавени неколку дворови и подрумски простории.
– Каналите во овој дел од општината се чистат редовно, но проблем е тоа што нивото на каналот кај Стајковци е повисоко од она на обиколницата. При реконструкцијата на обиколницата направена по големата поплава од 2016 година работено е само на коловозот и обиколницата, но не е решен проблемот на различното ниво на двата објекта каналот и обиколницата – велат од општина Гази Баба.
Оттаму додаваат дека веќе се работи на решение на проблемот.
– Се работи на проект заедно со владата и се надеваме дека за одреден период ќе се реши ова прашање – велат од општина Гази Баба.
Дополнително, Општината веќе има и подготвено стратегија со која за неколку години треба да го реши проблемот на слевањето на водите од Скопска Црна Гора.
– Скопска Црна Гора со одлука на Советот на општината е прогласена за ерозивно подрачје кое со заедничка активност на повеќе институции и општината треба да се пошуми. Во меѓувреме, се работи на редовно чистење на каналите во регионот. Но сето тоа нема брзо да ја реши опасноста од излевање на коритото и секако од можноста од поплави – велат од општината.
За време на вчерашното невреме имало излевање на канализација во населбата Ченто, како и поплавени ниви, дворови и неколку подрумски простории во Стајковци, а биле поплавени и две куќи во Црешово. На обиколницата, како што тврдат од општина Гази Баба, имало само мало излевање на вода.
