Цел демократски свет и даде поддршка на Македонија и испрати јасна порака дека сега имаме историска шанса и треба да ја искористиме.
Пораката од светските државници е иста, дека од гласањето на референдумот зависи зачленувањето на Македонија во ЕУ и НАТО, но и дека Македонија не е сама во борбата за подобра иднина.
Речиси сите македонски политичари и од власта и од опозицијата во изминатиов период повторија дека не отстапуваат од евроатланската интеграција.
Но без прифаќање на Договорот со Грција, јасно е дека ќе останеме заборавени во чекалните на НАТО и ЕУ.
Ова е голема одлука, од која зависи иднината на сите нас.
За жал лидерот на ВМРО-ДПМНЕ до крајот на кампањата не го соопшти својот став, а разногласието во ДПМНЕ ги збуни членовите и симпатизерите. Крајно несеризно однесување на оние кои ја водат една од најголемите партии во државата и тоа во клучен момент кога се носи одлука за иднината.
Освен обвинувања дека Договорот е лош, од ДПМНЕ не слушнавме каков подобар Договор би направиле тие.
Ставот на ГДУ е јасен и недвосмислен, ние сакаме Македонија што поскоро да ја видиме како дел од Алијансата и членка на ЕУ, да бидеме напредна и безбедна земја во која ќе владее правото , во која жестоко ќе се бориме против корупцијата, во која ќе зборуваме за вистински реформи, а не за проблеми со соседите.
Власта пак треба да биде свесна дека само со трибини и договори, нема да ја внесме Македонија во ЕУ и НАТО, треба многу работа и искрена волја за реформирање и градење на подобар систем.
Авторот е генерален секретар на ГДУ
