Претседателот на техничката Влада, Оливер Спасовски, денеска се сретна со францускиот амбасадор во земјава Кристијан Тимоние.
На средбата, Спасовски го убедуваше Тимоние дека земјава постигнала многу на домашен и на меѓународен план и дека се движи во вистинската насока во однос на интеграциите. Тој исто така посочи дека и техничката Влада ќе продолжи да се фокусира на реформските процеси.
– Владата ќе работи динамично. Посветени сме да продолжи напредокот во сите можни сегменти. Нашата определба се функционални институции, активно вклучени во реформските процеси, во интерес на сите граѓани и на интеграциските процеси на државата. Покажавме дека договореното се почитува, преодната Влада беше формирана согласно политичкиот договор, како и законските и уставните услови, без никакви проблеми и ова е доказ дека нашиот политички и институционален систем функционира добро. Ќе продолжиме со политиките на дијалог што придонесуваат кон добра клима во државата. Општите и државните интереси мора да бидат во прв план кај сите политички субјекти. Новата 2020 година е значајна година за граѓаните на нашата држава, поради остварувањето на полноправното членство во НАТО, но подеднакво важни за нас се и европските интеграции. Очекуваме дека 2020 година ќе го направиме најдоброто во пријателството помеѓу нашите две држави и дека тоа ќе функционира на високо ниво – рече Спасовски.
