Дваесет и деветгодишниот Јозо Калапиш од место покрај Зрењанин е уапсен поради сомнение дека го убил 86-годишниот Јанош Касаш. Наводно, до трагедијата дошло откако сопругата му кажала на Калапиш дека старецот ја допирал и ѝ досадувал, пренесуваат српските медиуми.
Несреќниот настан се случил на 15 јули, во семејната куќа на Касаш. Калапиш бил уапсен откако по жестока расправија земал маша и го удрил старецот по главата. Тој им подлегнал на повредите.
– Јанош беше домаќин, имаше имот и беше вреден. Беше и доста витален за своите години, добро се држеше. Иако можеше да ѝ биде дедо на сопругата на Јозо, тој кон неа подолго време беше безобразен. Таа работеше кај него и често му помагаше околу имотот, меѓутоа, тој тоа го злоупотребуваше. Ја штипкаше Ангелина, ја допираше по телото, ѝ зборуваше непригодни работи и константно ѝ нафрлуваше предлози да бидат интимни. Нејзе ѝ дојде преку глава, па му кажа на сопругот. Јозо и онака е малку незгоден, сака и да се напие, а тоа што му го кажа сопругата го зголеми неговиот бес. Долгата расправија се претворила во напад. Не е познато дали и Јанош се обидел да го нападне осомничениот – тврдел извор од истрагата за „Пинк“.
Мештаните кажале дека Јозо и неговата сопруга работеле сѐ и сешто по селото за да заработат за живот.
– Јозо, иако беше често агресивен и лесен на чашка, многу работеше и се бореше во животот. Јанош живееше сам бидејќи сопругата му почина неодамна, а ќерка му е во странство – рекол сосед на Јозо.
