Скопјани кои деновиве „заработија“ скршеници на лизгавите улици веќе го преполнија одделот за трауматологија и ортопедија во Градската Општа Болница „8. Септември“, па новите пациенти мора привремено да ги примаат и на други одделенија во оваа установа.
Уште од 8. јануари почна засилениот прием на повредени граѓани во оваа и во другите скопски болници.
– Динамиката на прием е слична како и во изминатите денови, имаме и по 30 до 40 прегледи дневно, а со скршеници хоспитализираме најмалку по 3-4 пациенти речиси секој ден, немавме приеми само во недела. Оперираме и во сабота поради зголемениот прилив на пациенти со скршеници, па веќе се преполнети нашите оддели, па мораме овие повредени на неколку дена да ги сместуваме и по други одделенија во болницата – вели д-р Зоран Несторовски, раководител на трауматолошко-ортопедското одделение во ГОБ „„8. Септември“.
Во Универзитетската Клиника за хируршки болести „ Свети Наум Охридски“ во Скопје велат дека во последниве денови откога е паднат снегот имаат зголемен број прегледи на лица со скршеници.
– Од вчера од 8 часот до денеска напладне имаме 25 пациенти што се јавиле за преглед поради паѓање на снегот и мразот во Ургентната амбуланта, а 4 се примени на Трауматологија. Има и помлади скопјани што се здобиле со набиеници и скршеници, но повеќето се постари граѓани кои скршиле некој екстремитет и тоа одејќи најчесто на пазар. Дел од пациентите се од другите градови, но повеќето се од Скопје, кои паѓајќи на снегот скршиле најчесто долни екстремитети или пак рачен глужд и лакот. Имаме примено и постари жени кои го повредиле колкот – изјави д-р Бурим Елези од оваа клиника.
Тој ги повторува советите граѓаните многу да внимаваат кога се движат на вакво време, а постарите најдобро воопшто да не излегуваат од дома.
