Статус на мајка чии деца биле нападнати поради расна основа, се шири на интернет со осуда за насилниците. Луѓето се прашуваат како може ова да се случува во 21. век.
– Син ми и неговите брат и сестра биле нападнати вербално на расна основа од страна на двајца млади мажи околу 20 години. Им го попречувале патот и ги нарекувале “niggers“. Син ми е удрен со многу силна тупаница по главата поради тоа што ги прашал дечките зошто ги навредуваат и дали тоа го прават на секој поразличен физички од нив. Имало луѓе наоколу, но никој ништо не сторил во моментот. Јас како мајка случајот го пријавив во полиција и им ветувам на моите деца, дека јас како нивен протектор, овде, дома, нема да дозволам повеќе да бидат/бидеме вербално и физички напаѓани без никаква основа, а никако па на расна основа – напиша мајката на Фејсбук.
Од Министерството за внатрешни работи потврдија дека таков случај има пријавено.
– Во Полициската станица Центар, вчера во 21.30 часот М.А.М.(38) од Скопје пријавила дека истиот ден околу 18.20 часот на плоштад Македонија нејзиниот 13- годишен син, кој бил со своите брат и сестра, бил физички нападнат од две непознати лица – рекоа од МВР за Плусинфо.
Се работи на расчистување на случајот.
