Граѓаните можат да бидат мирни оти становите во кои живеат се градени според европските стандарди. Градежниците тврдат дека вградуваат квалитетни и проверени материјали кои задоволуваат 2.000 европски стандарди и голем број македонски стандарди.
Ова беше речено на денешната прес-конференција на Градежната комора на Македонија на Сојузот на стопански комори на која беа презентирани најновите стандарди од страна на Институтот за стандардизација (ИСРМ) прилагодени на најновите измени на Законот за градежни производи.
– Градбите во земјава се далеку на повисоко ниво од оние во регионот, бидејќи сме на трусно подрачје. Секој градежник пред да почне да вградува одреден материјал во градбата лабораториски ги испитува материјалите и дали тие се произведени според стандардите. Дополнително во целиот процес на градба се проверува и издржливоста на градбата на земјотереси од страна на Институтот, што говори дека градбите се квалитетни – вели претседателот на Градежната комора при ССК Ивица Јакимовски.
Тој појасни и дека секој купец на стан има можност самостојно да направи проверки на документацијата на инвеститорот, но и самиот да направи лабораториски испитувања на квалитетот на материјалите.
Според Соња Черепналковска, раководител на секор за стандардизација во Институтот за стандардизација, најодговорни за тоа дали ќе бидат вградени проверени и квалитетни материјали во една градба се инженерот кој го врши надзорот на градбата и Државниот градежен инспекторат.
– Но за тоа дали во земјава ќе се увезат неквалитетни градежни материјали зависи од конролата на Царинската управа и Државниот градежен инспекторат – вели таа.
Но и покрај ваквото тврдење, директорот на Институтот за стандардизација Џевад Кицара рече дека сѐ уште некои компании покажуваат фотокопии на европските стандарди што може да се толкува дека ги немаат оригиналите.
– Апелирам градежните компании при купување на градежните метаријалите да ги бараат оргиналните стандарди за да бидат сигурни во квалитетот на производот – рече Кицара.
Тој додаде дека во земјите од регионот кај нас стандардите се најевтини. Нивната цена се движи од 500 до 3.000 денари.
Сите се согласни дека без примена на стандарди во производството на градежните материјали нема да има и квалитетна градба.
– Работата по стандарди значи поттикнување на конкурентноста и излегување на пазарите во светот. За градежните компании да реализираат одреден проект неопходна е меѓусебната соработка со голем број чинители во секторот, најпрво со цел исполнување на законските стандарди, па понатаму до финална реализација. Новите стандарди што ги налага ЕУ, како еврокодовите, се чекор напред во подигнување на квалитетот на техничката регулатива за овој значаен сектор – изјави Јакимовски.
Черепналковска информира дека во градежништвото постојат околу 2.000 европски стандарди кои се прифатени како македонски национални стандарди, класифицирани според групацијата на производи, но има и македонски стандарди како замена за стандардите кои сѐ уште не се прифатени.
– Дел од стандардите за градежни производи се усогласени и претставуваат техничка поткрепа на Законот за градежни производи, закон кој е донесен во 2015 година, а кој е со најновите измени е со задолжителна примена од 30 септември 2018 – вели Черепналковска.
Досегашните искуства, рече таа, покажуваат дека компаниите главно ги набавуваат стандардите кои им се обврзувачки со закон и покрај тоа што поголемиот дел од овие стандарди имаат и пропратни стандарди.
