Зијадин Села и Билал Касами договориле Алијансата за Албанците и БЕСА да предложат заеднички кандидат за член на Државната изборна комисија (ДИК).
Ова за Плусинфо попладнево го потврди висок функционер на БЕСА на Касами, како и портпаролот на Алијансата Флакрон Беџети.
Двете партии прво ќе предложат по двајца или тројца канидати од кои ќе треба да изберат еден кој ќе биде заеднички предлог до Собранието.
– Точно е дека имало средба помеѓу претседателот на Алијансата за Албанците Зијадин Села и Билал Касами од БЕСА. Се разговарало за меѓупартиска соработка. Како две опозициски партии во однос на зачувување на опозицискиот глас се согласивме дека како опозициски албански партии треба да бидеме здружени во Државната изборна комисија – вели Беџети.
Огласот на Собранието за избор на членови на ДИК е во тек и деновиве се очекуваат предлози од сите партии.
Неофицијално, од БЕСА тврдат дека Касами и Села разговараат и за можноста двете партии во Собранието да настапуваат како пратеничка група. За ова ќе биде потребно да придобијат уште еден пратеник бидејќи пратеничката група се формира со пет пратеници, а тие имаат вкупно четири пратеника.
