Јасно е дека ЕУ бара да имаме нов закон за јавно обвинителство и една политичка партија не треба да го блокира неговото донесување, смета лидерот на Алијанса за Албанците, Зијадин Села.
Според Села, новиот предлог – закон за јавно обвинителство треба да помине, но не „така, бланко“ како што предлага Владата, туку со искажаните забелешки од кои голем дел се веќе уважени.
– Никој не треба ноншалантно да се однесува и да ја блокира надежта што ја имаме, дека во март ќе добиеме датум за преговори со ЕУ – истакна Села, одговорајќи на новинарски прашања пред денешниот работен состанок во Стопанската комора на северозападна Македонија (СКСЗМ).
Во однос на законот, потсети, ставот на Алијансата е преточен во амандмани.
– Нашиот став е дека треба да се чува Специјалното обвинителство и дека на негово чело треба да дојде обвинител од земјите-членки на ЕУ. Пратениците од Алијансата на средба со министерката за правда ги кажаа забелешките за новиот закон за јавно обвинителство и голем дел од нив се прифатени – рече Села.
Тој уште еднаш укажа што треба да се направи со правниот систем кај нас.
– Прво, да се врати Прибе 3 за да оцени до каде се исполнети препораките од Прибе 2, второ, експерти, судии и правобранители од ЕУ да дојдат и да ги отворат уште еднаш сите затворени предмети кои имаат врска со висок политички криминал и корупција зашто не може да бидеме земја во која за 30 години ниту еден политичар не е осуден за корупција и трето, по примерот на Украина, Молдавија, Грузија да се мониторираат однадвор сите судски постапки на оноа обвинителство што ќе го наследи специјалното – напомена лидерот на Алијанса за Албанците.
Треба да се отворат, дециден е Села, и политичките процеси за кои има многу сомнежи во јавноста дека се монтирани и дека во нив се наводно давани многу високи казни.
