На седниците на Извршниот и Централниот одбор на СДСМ вечерва нема конечна одлука дали владејачката партија ќе оди на предвремени парламентарни избори. Дали ќе се оди и на парламентарни избори, Централниот одбор го овластил највисокото раководство на партијата да одлучи, а тоа, како што најави генералниот секретар на паријата Александар Кирацовски, треба да се случи во текот на наредната недела.
Вечерва, како што кажа тој, „провејувале“ различни ставови и сите ќе се земат предвид.
Кога станува збор за претседателските избори, владејачката партија ја започна процедурата, а кандидатот официјално ќе се потврди на конгрес на 3 март.
– Централниот одбор на СДСМ ја донесе одлуката да ја започне процедурата за избор на кандидат на претседател на државата која ќе се комплетира на Конгресот на 3 март. На Република Македонија ѝ треба вистински претседател кој ќе работи за доброто и интересите на државата. Централниот одбор донесе и одлука за отпочнување на постапката за избор на кандидати за градоначалници за Дебар, Охрид и Ново Село. Централниот одбор го овласти највисокото раководство да донесе одлука дали заедно со претседателските ќе се одржат и предвремени парламентарни избори – изјави Кирацовски.
Премиерот Зоран Заев вечерва не присуствуваше на седниците бидејќи владиниот авион не можеше да слета на аеродромот во Скопје поради невремето, па беше пренасочен кон Софија. Заев е веќе вратен во земјава, но вечерва нема да оди во партиското седиште.
Неофицијално, неможноста Заев да присуствува на седници е една од неколкуте причини зошто вечерва не падна одлука дали ќе има предвремени парламентарни избори.
