Поранешен вработен во Петтата управа во УБК, Маријан Јанкуловски, кој имал задача да одржува и сервисира компјутери, но и во системот за прислушување да маркира телефонски броеви, утрово во Основниот кривичен суд во Скопје сведочеше во судскиот процес за масовното прислушување „Таргет-Тврдина“.
Сведокот на почетокот на неговото сведочење кажа како се добивале наредбите да се маркира одреден број.
– Многу доцна дојдоа судски наредби, прво се одеше со ливче или со СМС порака. После тоа началникот Горан Грујевски воведе некои листови, со број, со псевдоними.. Најчесто ги добивавме од Надица Николиќ (обвинета), а потоа ги дававме на репродуцерите кои треба да ги работат и тие претпоставувам ги враќаа на претпоставените – рече Јанкуловски, кој потоа посочи и дека налог за маркирање имал.
Тој раскажа и каква била структурата во системот за следење на комуникацијата. За постариот систем, „Веринт“, рече дека не се сеќава, а во системот „Најс“ посочи дека броевите кои се следеле се класифицирале во три фолдери: Државна безбедност, Јавна безбедност и Важно.
– Во фолдерот јавна безбедност се ставаа броевите кои беа побарани од деловите на јавна безбедност, во државна безбедност беа ставени барањата за броеви и псевдоними кои ги бараше државната безбедност. За третиот фолдер, немав сознанија кој ги бара тие броеви да се следат. Информацијата кој телефонски број во кој фолдер да биде маркиран ми ја даваше Надица Николиќ – рече сведокот.
Обвинителот праша и кој имал пристап до фолдерот Важно, а Јанкуловски кажа дека по дифолт таму пристап имале пет корисници, кои најчесто биле и единствените со пристап до тој фолдер.
– На почетокот нивните кориснички имиња беа составени од првата буква на името и целото презиме, а подоцна началникот Горан Грујевски ги смени во некакви шифри. Според првичниот начин на работа, знам дека беа сигурно Надица Николиќ, Горан Грујевски, Сашо Мијалков, мислам дека беше и Александра Велинова и Тања Кипровска. За последните две не можам да тврдам – раскажа сведокот.
Пензионираниот маркирач посочи дека покрај трите фолдери кога се вовеле судски наредби се отворил фолдер со име Судски наредби.
– Многу често се случуваше некои броеви кои ги внесуваме да се дуплираат, а самиот систем да ни каже дека бројот веќе е ставен во системот односно веќе му се следат комуникациите. Системот ни кажуваше и кој ги ставил броевите и таму се појавуваа кориснички имиња како, на пример, марк11, марк12. Не знам кои беа тие – сведочеше поранешниот вработен во УБК.
Сведокот рече дека добивал задачи и да реже ЦД со разговори, задолженијата оделе на ливче хартија, но и со судски наредби откако се вовеле тие.
– Налозите за режење што не беа со судски наредби ги добивав од Надица Николиќ и нејзе и ги враќав. Еднаш имав вакво барање за режење на ЦД-иња од Горан Грујевски. На нив имаше разговори од прислушувањето со судска наредба на Зоран Заев – рече сведокот.
Сведочењето на овој сведок е во тек.
Во „Таргет-Тврдина“ првообвинет е поранешниот директор на УБК Сашо Мијалков, поранешниот началник на Петтата управа во МВР Горан Грујевски и вработениот во УБК Никола Бошкоски, како и поранешната министерка за внатрешни работи Гордана Јанкулоска, шефот на кабинетот на Мијалков, Тони Јакимовски, Владимир Варелов од УБК и уште пет други лица од Управата.
Според обвинителниот акт, преку три системи за следење на комуникациите во УБК, во периодот од 2008 до 2015 година незаконски биле следени 4.286 телефонски броеви за кои воопшто не биле издадени судски наредби.
