Во Кривичниот суд во Скопје денеска на рочиште за 27 април се сослушуваат сведоци на обвинетиот Богдан Илиевски Бетмен. Еден од нив е Томислав Јовановски, член на мото-клубот „Ноќни волци” кој кажа дека како клуб во два наврати учествувале на протестите „За заедничка Македонија” и ја предвиделе поворката.
Тој кажа дека протестите биле мирни и без никакви проблеми. На 27 април рече дека не бил на протестите но кога видел на телевизија што се случува заминал накај Собрание и го побарал Бетмен.
– Го најдов Богдан. Беше исплашен збунет и испотен. Го прашав што се случува внатре и ми одговори „Само те молам не влегувај” – рече Јовановски.
Како сведок на Бетмен сведочеше уште една учесничка на протестите, Ивона Опетческа Татарческа. Таа рече дека дента протестите тргнале како и претходно, од пред Владата кон Собранието. Пред законодавниот дом, таа требало да биде еден од гостите говорници, а било предвидено играорна група да го изигра орото Копачка.
– По десетина минути мое говорење прашав дали сега се на ред играорците бидејќи стоеја позади и дали може сега да излезат да го одиграат орото. Но, луѓето на мобилните виделе дека во Собранието се пеела химна на друга држава и беа вознемирени. Тогаш Богдан рече дека ќе го одложиме за кратко орото, а насобраните ги замоли да не довикуваат на полицијата, бидејќи таа е таму по службена должност – раскажуваше сведокот потенцирајќи дека не насетувале дека нешто се случува.
Поради атмосферата, играњето се откажало, играорците заминале.
– Повозрасен господин со мобилен телефон викна вознемирено: „Д жали гледате вие што се случува во Собранието? До кога ќе се заебавате со нас?” Богдан му одговори: „Јас никогаш нема да повикам на насилство” – рече Опетческа Татарческа.
