Дали и како Русија ќе се помири со влезот на Македонија во НАТО? И додека траат заслужените честитки за огромниот успех на премиерот Заев и неговиот тим, руската дипломатско-шпионска армада не мирува. Веднаш дојде реакцијата на рускиот Комитет за надворешни работи на Горниот дом на рускиот парламент.
Претседателот на Комитетот, Константин Косачев ја пренесе руската фрустрација, нарекувајќи го НАТО реликт на Студената војна, нарекувајќи го зачленувањето на Македонија „симболично“ и дека ние сме мала земја што не ѝ е важна на Алијансата. Според него, НАТО ќе ја употреби Македонија против Русија и дека нашето членство не е добро ни за Македонија, ни за европската безбедност.
Е, па како тоа, тавариш Косачев, Македонија е мала и безначајна за НАТО, а тоа истовремено не е добро за европската безбедност и ќе биде употребено против Русија?
Русија вложи огромни ресурси во пропагандната и шпионската активност против САД и Европа, а на нејзината мапа, секако, се наоѓа и Балканот, вклучувајќи ја и Македонија и сите нејзини соседи. Во таа војна без огнено оружје, но речиси подеднакво деструктивна, Русија употреби перфектно развиени стратегии со скапи и комплексни системи. Во текот на изминатите години видовме како огромното знаење и искуство на озлогласениот Комитет за државна безбедност (КГБ – Комите́т Госуда́рственной Безопа́сности) напреднале и се надоградиле во секоја смисла на зборот.
Машинеријата на рускиот автократ (според руската опозиција: диктатор) ангажира немерливи финансиски, технолошки и човечки ресурси во таа војна. Палетата на операции е богата: од ликвидации и киднапирања, до софистицирани начини за злоупотреба на Фејсбук и другите социјални мрежи. Со употреба на овие системи, Русија се обиде да изврши влијание врз американските избори во 2016 година, а имаше несомнено влијание и во Брегзит. Насекаде во Европа може да се насети руската шпионска и пропагандна канџа која не ја одмина ни Македонија. Тоа најдобро се почувствува за време на референдумскиот процес минатата година.
Меѓу алатките со кои се користи руската дипломатско-шпионска и пропагандна машинерија, се социјалните мрежи. Тоа е безграничен простор на кој, релативно евтино, своја база наоѓаат сите владини и невладини, добронамерни и злонамерни, криминални и бенигни, комерцијални и некомерцијални ентитети во светот. Првенствено Фејсбук, но и другите социјални мрежи станаа едно огромно електронско боиште на кое битката може да трае сосема кратко (минути, часови, неколку дена…), но сосема доволно за драстично да се промени курсот на некој процес во општеството.
Една од „трол фабриките“ што ги „изгради“ Русија е Агенцијата за интернет истражувања чиј прв донатор е рускиот олигарх и мултимилијардер Јевгени Пригожин, еден од најблиските соработници и поддржувачи на Владимир Путин. Оваа агенција имаше буџет од 12 милиони долари во 2016 година (изборната година во САД), 12,2 милиони долари во 2017 година и околу 20 милиони долари во 2018 година. Оваа агенција или, поточно, трол фабрика, влијае на јавното мнение во таргетираните земји преку социјалните мрежи и медиумите со лажни вести, милиони лајкови, споделувања и коментари, од кои голем дел се спонзорирани содржини.
Најчесто употребуваните алатки во пропагандната војна на социјалните мрежи се лажните вести, говорот на омразата, теориите на заговор и релативизирањето (крив е Хитлер, но криви се и Евреите, да ви доловам на што мислам).
Само за илустрација, Американскиот сенат подготви еден опширен извештај за руската „трол фабрика“, објавен во декември минатата година, според кој Фејсбук бил особено успешно злоупотребен во текот на изборниот процес во 2016 година. Фејсбук бил посебно ефективен во таргетирањето на конзервативците и Африканските Американци во САД.
Речиси целосниот корпус на Фејсбук „ангажирањето“ (лајкови, споделувања и други реакции на мрежата) доаѓаат од само 20 Фејсбук страници како што се „Да се биде патриот“, „Срцето на Тексас“, „Армијата на Исус“ и „Блективист“ (црн активист) – сите под контрола на руската „трол фабрика“. Само во 2016 година, тие 20 Фејсбук страници генерираат 39 милиони лајкови, 31 милион споделувања, 5,4 милиони реакции и 3,4 милиони коментари. Опфатот на овие содржини е 126 милиони луѓе на Фејсбук и 20 милиони на Инстаграм (кој е во сопственост на Фејсбук). Во периодот 2016-2018 година, само на Инстаграм, руската трол машина генерира 185 милиони лајкови и четири милиони коментари.
До овој момент, во Македонија не е објавено ни едно детално истражување за начините на кои се (зло)употребуваат социјалните мрежи во Македонија, било да се тоа домашни или странски шпионско-пропагандни центри. Кој знае да гледа, гледа, но другите се само топовско месо на црната антимакедонска пропаганда.
Се надевам дека со ова ќе помогнам на поинаков начин да го „читате“ рускиот напад од надвор и проруските националистички електронски банди од внатре. Без параноја! Тоа е сосема нормално во светот на денешнината. Доволно е да знаеме дека, за сега, Русија и нејзините пиончиња ја изгубија војната од прогресивните сили во Македонија.
