Републичкиот Судски совет, на денешната седница, го разреши од судиската функција поранешниот претседател на скопскиот Кривичен суд, Владимир Панчевски. За оваа точка се расправаше зад затворени врати.
Панчевски е обвинет за злоупотреба на службена положба за распределувањето на предметите преку АКМИС, но судењето уште не е почнато, бидејќи неколку пати се одложува. За Панчевски се водеше постапка за нестручно и несовесно работење, така што од летоска беше и суспендиран од работното место судија за прекршоци во Основниот суд Скопје еден.
Летоска, Судскиот совет го разреши од функцијата и првиот човек на Врховниот суд Јово Вангеловски.
На денешната седница за претседатели на основните судови во Струга и Кавадарци беа избрани Ифет Бајрамовски и Лазар Нанев, кои воедно беа и единствени кандидати. Членовите на Судскиот совет го изгласа и Правилникот за начинот на рангирање на кандидатите за судии од Академијата за судии и јавни обвинители.
На денешната седница беше одложена точката за избор на шест судии на Апелацискиот суд Скопје, тројца судии за кривична област, двајца судии за граѓанска област и еден судија за стопанска-трговска област. Одложувањето на оваа точка е поради немањето координација и согласност меѓу членовите на Советот.
Седницата ќе продолжи в понеделник.
