Прирачникот „Наслови“ од м-р Биљана Илиќ, наменет за новинарите и за уредниците кои работат, пред сѐ, во интернет медиумите, е публикуван деновиве од Здружението Член 16, издавач на порталот Плусинфо, каде авторката е главен уредник.
Авторката го подготвила овој прирачник врз основа на секојдневната осумгодишна работа на порталот Плусинфо, со цел да ги дефинира начините на кои се раѓа добриот наслов и да објасни како се учи вештината да се смисли најдобриот „излог“ за најдобриот новинарски производ.
Во последнава деценија, откако се појавија интернет медиумите и се зголеми присуството на публиката на социјалните мрежи, насловот како дел од новинарскиот производ доби огромна важност и функција. Насловот е информација, но и клик, мамка, повик да се прочита или не, новинарскиот текст. Насловот може и да го „убие“ и да го закопа новинарскиот текст и труд. Ако не смислите добар наслов, целиот ваш труд, за жал, може да пропадне и да не ја постигне целта.
– Смислувањето убав наслов е мини авторско дело. Тоа се заснова на долгогодишно искуство во новинарството, на начитаност и општо знаење, на остра и бистра мисла, на интуиција, осет за прецизност и концизност. Мајстор на добриот наслов не се станува преку ноќ. Затоа, потребна е секојдневна пракса. Вежбајте, размислувајте, бидете креативни и извлечете го најдоброто од себе и од својот новинарски тим. Советите дадени во овој прирачник може да ви помогнат во тоа – вели авторката Илиќ, која за првпат прави и поделба на 10 видови наслови.
Прирачникот „Наслови“ може да се нарача на мејлот contact@arhiva.plusinfo.mk или на телефонот 070 341-113, по цена од 200 денари.
Објавувањето на публикацијата „Наслови“ е финансиски целосно покриено од сопствени средства на Здружението Член 16.
