Претседателот на Европскиот комитет на регионите, Карл-Хајнц Ламберц, кој од вчера престојува во дводневна работна посета на Република Северна Македонија, денеска ќе има средба со неговиот домаќин, вицепремиерот задолжен за европски прашања, Бујар Османи, а ќе биде примен и од шефот на државата Стево Пендаровски и претседателот на Парламентот, Талат Џафери.
Ламберц ќе оствари средби и со министрот за локална самоуправа Горан Милевски, како и со претседателот на Заедницата на единиците на локални самоуправи (ЗЕЛС) и градоначалник на Град Скопје, Петре Шилегов и со копретседавачот на Делегацијата на Република Северна Македонија во работата на Заедничкиот консултативен комитет и градоначалник на Штип, Благој Бочварски.
Како што соопшти Секретаријатот за европски прашања, предвидено е Османи и Ламберц да разговараат за можностите за унапредување на соработката која се одвива преку Заедничкиот консултативен комитет меѓу Република Северна Македонија и Комитетот на региони на Европската унија, како дел од напорите на земјата за усогласување со европските правила, стандарди и вредности на сите нивоа.
Покрај актуелностите поврзани со европските интеграции, ќе бидат отворени и темите за развојот на локаните власти, децентрализацијата, соработка помеѓу централната власт и локалната самоуправа, како и размена на добри практики меѓу европските региони и градовите, се наведува во соопштението.
На првиот ден од престојот во Скопје, Ламберц синоќа се сретна со министерот за надворешни работи Никола Димитров, при што се разговараше за европските интеграции на земјава и за очекувањата од претстојниот октомвриски Совет на ЕУ, како и за прашања поврзани со кохезијата, децентрализацијата, прекуграничната соработка, намалувањето на економските разлики меѓу различните европски региони, како и пошироко за иднината на Европа.
Photo: EPA-EFE/OLIVIER HOSLET
