По изрекување на пресудата за поранешниот премиер и лидер на ВМРО-ДПМНЕ Никола Груевски за случајот „Тенк“, пратениците од оваа партија ја напуштија 46-та пленарна седница што е во тек.
Засега нема официјална информација дали поради пресудата тие ја напуштија собраниската седница.
Претходно Собранието не ги изгласаа измените на Законот за акцизите, предложен токму од опозициските пратеници. Со овие измени се предлагаше намалување на акцизата на дизел горивото за три денара по литар од 15,121 денари на 12,121 денари по литар и намалување на акцизата на гасното масло, што се користи како гориво за греење односно црвена нафта за три денари по литар од 6,136, на 3,136 денари по литар. Со измените всушност се бараше враќање на старата цена на дизелот, со што би се излегло во пресрет на граѓаните имајќи предвид, што според нив, зголемувањето на цената на дизелот негативно се одразил врз буџетот на секое семејство.
Пратениците од владејачкото мнозинство кои останаа во салата го ислушаа обраќањето на народниот правобранител Иџет Мемети кој го презентираше Годишниот извештај за неговата работа.
