Пресврт во пласманот на Македонија на Евровизија.
По само неколку дена откако заврши ова натпреварување, ЕБУ сега ја исправи грешката и Тамара, наместо осмото, го освои седмото место во финалниот пласман. Грешката е откриена во гласовите на белоруското жири, а по исправањето на истата, Македонија е прва според гласовите на жирото.
Ова го објави Тамара денеска попладне, по добивање на известувањето од ЕБУ.
– Каква прекрасна вест. ЕБУ само што потврди дека поради грешка во Белоруското гласање, нашата земја е всушност прва од жири и седма во финалето на Евровизија. Не можам да ви опишам колку сум среќна! Ве сакам сите!, напиша Тамара.
Според објавениот извештај на веб-страницата на Евровизија, направен е превид во броењето на гласовите на жирито од Белорусија.
– ЕБУ може да потврди дека по стандардната контрола на резултатите, утврдивме дека, како резултат на човечка грешка, направен е превид при собирањето на поените. Ова нема никакво влијание на пресметката на поените добиени од „телевоутингот“ на 41 земји-учеснички и на севкупниот победник, како и во редоследот на првите четири песни од натпреварот, стои на веб-страницата на ЕБУ.
Според резулатите од гласањето на жирито и од „телевоутингот“ на 41 земји-учесничка на изборот за песна за Евровизја за 2019, што се одржа во саботата во Тел Авив, Израел, за севкупен победник беше прогласен претставникот на Холандија, а тогаш нашата претставничка Тамара се пласираше на осмото место.
