Живи статуи од Шпанија, Бугарија, Србија, Украина и Македонија ќе учествуваат на фестивалот „Статуафест – другото лице на улицата“ кој денеска и утре од 18 часот до полноќ ќе се одржува на улица „Македонија“ во организација на „Театроск“.
– Она што го прави овој фестивал поразличен од останатите е неговиот формат, односно живите статуи кои ќе го разубават градот и ќе ја покажат специфичноста на оваа професија пред македонската публика – соопшти „Театроск“, кој повеќе од десет години се занимава со живи статуи и на фестивалот ќе ја презентира и својата продукција.
Целта на организаторот е да го развие овој вид уличен фестивал во Скопје по примерот на европските центри.
Покрај живи статуи, фестивалот ќе има и музичка програма со настапи на диџеи и бендови. Покровител е Град Скопје и се организира со поддршка на спонзори.
