Пронајдоци, иновации, нови технологии и производи, технички унапредувања, индустриски дизајн, трговски марки и младинско-истражувачко и креативно творештво ќе бидат изложени денеска на традиционалната и најголема Меѓународна изложба Макинова 2019 што се одржува по 40-ти пат, во организација на Сојузот на пронаоѓачите и автори на технички унапредувања на Македонија – Спатум и Народна техника на Македонија по повод Светскиот ден на науката.
Изложбата Макинова 2019 ќе биде придружена по 17-ти пат со изложбата Еконова 2019 на иновации, пронајдоци и идеи чија цел е подобрување на животната средина.
Покровител на Макинова 2019 и Еконова 2019 е претседателот Стево Пендаровски кој ќе ги отвори двете манифестации.
На меѓународната изложба Макинова 2019 и Еконова 2019 пријавени се 113 учесници од кои 75 од Македонија и 38 учесници од Црна Гора, Босна и Херцеговина, Србија, Бугарија, Република Српска и Словенија.
Изложбата ќе биде отворена во Музејот на Град Скопје и ќе може да се погледне до 10 ноември.
