Со Меморандумот за разбирање кој попладнево го потпишаа премиерот Зоран Заев и директорот на Женевскиот Центар за демократска контрола на вооружените сили ДКАФ, амбасадорот Томас Гурбер се воспоставува рамка за стратешка соработка меѓу Владата на РМ и ДКАФ за остварување на добро управување во безбедносниот сектор на Република Македонија.
Заев по потпишување на меморандумот рече дека со ова се обезбедува поддршка за подобрување на владеењето и реформите во секторот за разузнавање и безбедност.
– Оваа соработка е клучна, пред се заради враќање на довербата на граѓаните во институциите, како еден од врнвите приоритети на Владата. Потпишувањето на денешниот меморандум за разбирање е важен печат за гаранција на контролните механизми утврдени со новиот законски пакет за реформи во разузнавачкиот систем. Целта е темелно да се реформира системот на следење на комуникациите и концептот на работа на разузнавачките служби. Нема да се дозволи самоволно кршење на правата на граѓаните и се минимизира политичкото влијание врз можноста за незаконско и политичко мотивирано прислушување. Директор на ОТА ќе се бира со двотретинско и бадентерово мнозинство, а ОТА е гаранција дека никој нема незаконски да прислушува. ВРМ и МВР напорно работеа да создадат инклузивен процес во кој учествуваа сите – рече Заев.
Директорот на ДКАФ, амбасадорот Томас Гурбер честиташе на безусловната препорака за започнување на преговорите за челснтво во ЕУ.
– Чест ми е да го потпишам овој меморандум во името на ДКАФ. Ова е кулминација по долги разговори за поддршката за програмата за реформа на безбедносните служби во Република Македонија и разузнавањето. Особено е важно дека со ова оваа земја се носи еден чекор поблиску кон ЕУ. Со овој меморандум се формализира соработката на Владата и ДКАФ. Ќе го искористиме нашето знаење кое го имаме добиено во последните две години од реформи во западен балкан и пошироко. ДКАФ влезе во оваа програма за да ги направи луѓето државата посигурни и побезбедни преку поефикасни и потранспарентни институции, рече Гурбер.
