Пожар што изби синоќа после полноќ во Кавадарци, речиси пеплоса куќа, која со децении е дом на кавадаречко семејство. Со огнената стихија се бореле таткото и синот, кои се сопственици на куќата.
Во гасење на запалената куќа пожарникарите интервенирале од 1.45 до 4 часот изутринава, потврдија од Територијалната противпожарна единица. Во пожарот нема нема повредени.
– Со сите сили ги гасневме пламените јазици на минус шест степени Целзиусови, се боревме со огнената стихија која го зафати домот на кавадаречка фамилија. На лице место бевме десет пожарникари во два тима, за цело време во гаснењето учествуваа и таткото и синот чија куќа гореше. По нашата брза интервенција, големиот пожар беше локализиран, а огнот не се прошири на околните куќи – рекоа од кавадаречката противпожарна единица.
Куќата не е целата изгорена, но сега е без покрив и без услови за живот во неа. Покуќнината е целосно уништена. Се утврдуваат причините за пожарот и висината на материјалната штета.
