Мнозинството Французи веќе не ги поддржуваат протестите на движењето на „жолтите елеци” и сакаат тие да престанат, покажува истражување објавено од весникот „Журнал ди диманш”.
Од почетокот на протестите, „жолтите елеци” се повеќе ја губи поддршката кај населението, а сега дури 52 проценти сметаат дека протестите треба да престанат.
За споредба, во јануари „само” 37 отсто од Французите беа за ставање крај на протестите.
Во моментов „жолтите елеци“ ги поддржуваат само 24 проценти од анкетираните, покажува новото истражување.
Граѓаните, како што покажува истражувањето, се повеќе се дистанцираат од протестите, поради однесувањето, насилството и направените трошоци во државата.
Весникот наведува дека се помалку се луѓето кои излегуваат на протест, што јасно покажува се помала поддршка од граѓаните.
Минатата сабота, на третиот месец од почетокот на протестите на „жолтите елеци”, на улица излегоа 41.500 луѓе, а претходната сабота беа 51.400, укажува „Журнал ди диманш”.
Протестите на „жолтите елеци” започнаа пред три месеци поради незадоволството од политиката на претседателот Емануел Макрон, а продолжија и покрај отстапките, кои ги направи француската Влада, прифаќајќи голем број од барањата на демонстрантите.
Photo: EPA / IAN LANGSDON
