Организирањето на Самитот ЕУ – Западен Балкан во Загреб и отворањето преговори за членство на С. Македонија и Албанија во Унијата се меѓу главните приоритети на претседавањето на Хрватска со Унијата – изјави хрватскиот премиер Андреј Пленковиќ во обраќањето пред Европскиот парламент.
Претставувајќи ги приоритетите на хрватското претседавање со ЕУ, Пленковиќ пред европратениците порача дека Хрватска не ја крие амбицијата да се обиде да обезбеди поддршка од земјите членки на Унијата за старт на преговори за членство со земјава и со Албанија.
– Идниот извештај на Европската комисија и предлозите за подобрување на методологијата за процесот на преговорите ќе бидат важни. За кредибилноста на политиката на проширување важно е да се зачуваат принципите на почитување на политичките критериуми и индивидуалниот напредок. Секоја земја кандидат треба да се оценува врз нејзините резултати, при што крајната цел на преговорите останува членството во ЕУ. Тоа треба да биде главната определба на политиката за проширување – истакна хрватскиот премиер.
Пленковиќ потсети дека Европскиот парламент по француското вето лани во октомври, усвои резолуција со која се поддржува отворање на преговорите со Албанија и Северна Македонија и во која се подвлекува важноста на проширувањето, како за земјите кандидати, така и за ЕУ.
Со тоа, според Пленковиќ, Европарламентот ја потврди посветеноста кон кредибилната политика на проширување на ЕУ.
Хрватскиот премиер потенцира дека средбата на врвот од Загреб во мај ќе се одржи 20 години по првиот загрепски Самит, кој „ја отвори европската перспектива за Југоисточна Европа и за договорите за стабилизација и асоцијација“.
– Меѓу тие земји се наоѓаше и Хрватска, која единствено стана членка на ЕУ. Денес таа претседава со ЕУ и нашиот пример му дава уште посимболично значење на Самитот во Загреб. Затоа од Самитот во Загреб сакаме да им испратиме силен сигнал на нашите партнери од Југоисточна Европа кои се уште се во еден вид на европско претсобје и да им порачаме: Ако ги продолжите сите реформи и ги исполните сите критериуми за членство, Вашата европска перспектива не е ставена во прашање и вие сте добредојдени. Истовремено, ЕУ ќе Ви помогне да ги исполните вашите цели со учество во европските проекти, интегрирање на инфраструктурните мрежи со редовен политички дијалог на највисоко ниво и со промовирање на европските вредности и принципи – рече хрватскиот премиер
