Почина 65-годишна пензионерка од Штип од тропската болест лишманиоза, потврдуваат од Центарот за јавно здравје-Штип. Епидемиологот, д-р Александра Србиновска вели дека состојбата со оваа болест е загрижувачка и тоа во 21 век. Загрижувачки е што се откриени и три нови случаи на лишманиоза, кај две деца и еден возрасен маж, во изминатите три месеци.
– Оваа болест не се лекува со антибиотици, значи еден случај треба да нѐ алармира. Ние сега имаме заболен човек, кој што има 49 години и две деца, едното е шест, а второто една година. Ова заболување, ако не се забележи навреме и не се лекува, може да биде смртоносно и ги напаѓа сите органи. Веќе имаме и еден смртен случај – вели Србиновска.
Таа додава дека резервоар на оваа болест се кучињата, а мушичките се тие кои од кучињата ја пренесуваат на луѓето.
Србиновска нагласува дека инкубацијата е над шест месеци, во зависност од имунитетот на заболеното лице, а сипмтомите се изнемоштеност, болка, анемија, зголемуавње на јетрата и слезинката.
Од Анима Мунди денеска реагираа со соопштение: „Се обраќаме со цел да запре кревањето паника и страв во однос на бездомните кучиња и нивното поврзување со трагичната смрт на жена како последица од заболување со лишманија. Потребно е граѓаните да знаат дека извор на болеста не се кучињата – станува збор за сериозни шпекулации и дезинформации кои ги ставаат на удар кучињата – затоа што кучињата сами по себе никако не можат да бидат извор на болеста која се шири само преку инсект (мушичка), за што е потребно градот да врши редовна дезинсекција“.
