Поранешниот претседател на Основниот кривичен суд во Скопје, Владимир Панчевски, на вчерашната седница на Судскиот совет, беше суспендиран, а утрово тој се пожали дека бил избркан како партал иако сѐ уште не доби никакво известување.
„Ете и тоа го дочекав, утрово избркан како партал од канцеларијата и судската зграда, судски полицаец дојде да ја заклучи канцеларијата, ни одлука сум примил, ни официјално сум известен, ниту сум известен за било која од постапките на прогон против мене, освен од медиуми. Така функционира овој криминален систем! Тоа е таа „благодарност” на системот за 24 години стаж во правосудните органи од кои 11 години судиски стаж во Кривичниот суд со потврдени најдобри резултати! Слава на Зоран Заев и Радмила Шеќеринска!“, напиша Панчевски на Фејсбук.
Против него има и постапка за нестручно и несовесно вршење на судската функција, која сè уште не е завршена.
Исто така, против Панчевски, обвинителството поднесе и обвинение за местење предмети кај подобни судии додека бил на чело на скопска единица.
