Поддршката за лицата со посебни потреби и подобрување на условите во кои живеат како еден од приоритетите на Општина Карпош, беше повод денеска да се склучи Меморандум за соработка меѓу Општина Карпош и здружението на граѓани за лица со дисфункции, хендикеп, ретки болести и посебни потреби „Дајте ни крилја“.
Потписниците се обврзаа да имаат заеднички проекти во насока на заштита на децата и лицата со посебни потреби, унапредување на нивниот психофизички развој, социјализација и интегрирање во сите процеси.
Градоначалникот на Општина Карпош, Стефан Богоев посочи дека локалната самоуправа и претставниците на „Дајте ни крилја“ веќе разговарале за создавање сензорни простории – наменски, сензорни соби за децата со посебни потреби во основните училишта низ Карпош.
– Нашата цел е целосно да ги вклучиме учениците со посебни потреби во нормалното и тековно следење на наставната програма. Овие сензорни соби ќе го олеснат престојот на учениците во училиштата бидејќи ќе бидат опремени со посебни уреди, опрема и реквизити за овие ученици – рече Богоев.
Претседателката на здружението, Ребека Јанковска – Ристески го истакна своето задоволство од воспоставувањето на механизмот за соработка со Општина Карпош, со надеж за партнерство на голем број проекти и конкретна помош и поддршка на лицата со посебни потреби.
Едно од училиштата кое ќе добие сензорна соба е ОУ „Димо Хаџи Димов“, кое е пример за образовна установа во поглед на успешната инклузија на лица со посебни потреби.
Богоев посочи дека во еден од новите реонски базени во Карпош ќе биде развиена и програма за часови по терапевтско пливање.
