Не верувам дека ќе се постигне цензус за референдумот и оти ќе помине промената на името, но и во случај тој да помине нема да гласам за измени на Уставот. Ова е коментарот на повеќе од пратениците на ВМРО-ДПМНЕ со кои контактираше Плусинфо, а кои од вчера се редеа преку социјалните мрежи да го кажат својот став дека нема да гласаат за уставни измени.
За 24 часа половина од пратеничката група на најголемата опозициска партија се изјасни дека не прифаќа измени на највисокиот правен акт во државата.
Сепак, дел пратеници велат дека доколку референдумот успее допрва ќе разговараат во партијата како ќе постапат пратениците, особено поради веќе јавно прокламираниот став на претседателот на ВМРО-ДПМНЕ дека пратениците ќе ги поддржат уставните измени ако референдумот успее.
Пратениците кои веќе се изјаснија за ова прашање се Васил Пишев, Влатко Ѓорчев, Трајко Вељаноски, Дафина Стојановска, Зоран Илиоски, Емилија Александрова, Димитар Стевананџија, Ана Лашкоска, Павлинка Честојнова, Никола Мицевски, Магдалена Манаскова, Трајче Димков, Лилјана Затуроска, Лилјана Кузмановска,
– Не верувам дека ќе се постигне цензус за референдумот и дека ќе успее. Но и да биде така лично не би го променила ставот и нема да гласам за измени на Уставот – вели пратеничка на ВМРО-ДПМНЕ.
И други пратеници се на истите позиции. Тие тврдат дека ваквиот нивен став не се коси со изјавата на нивниот претседател, а главен аргумент им е дека е невозможно да се постигне цензус и да излезат 903.000 гласачи, односно дека и Мицкоски потенцирал дека клучно е да се исполнат двата услова.
Висок партиски функционер брифира дека прво ќе го чекаат исходот од референдумот и потоа ќе донесат став во партијата. Тој сепак додава дека ќе го почитуваат ставот на секој од пратениците.
Претседателот на ВМРО-ДПМНЕ Мицкоски во емисијата „Клик плус“ изјави дека ќе ја почитува волјата на граѓаните ако бидат исполнети двата услова и дека во таков случај пратениците ќе гласаат за уставните измени.
– Ако референдумот е успешен и ако мнозинството граѓани се изјаснат „за“ дека го поддржуваат сето ова, тогаш ситуацијата е јасна, односно, ако бидат исполнети двата услова, првиот да има цензус и мнозинството да гласа во насока на поддршка на референдумското прашање, ситуацијата е јасна. Партијата ќе донесе свој став, но во таков случај и за нас и за целата македонска политичка јавност е јасно дека референдумот ќе биде успешен ако бидат исполнети овие два услова и тука нема дилема – рече Мицкоски прашан дали ако референдумот биде успешен ќе им каже на пратениците од партијата да ги поддржат уставните измени за кои е потребно двотретинско мнозинство во Собранието.
Дилемата што се отвора е дали јавното изјаснување на пратениците дека нема да поддржат измени на Уставот уште пред да биде познат исходот од гласањето, е нова тактика во кампањата на ВМРО-ДПМНЕ за да се мотивираат граѓаните да го бојкотираат, или како што вели Мицкоски, да апстинираат на референдумот.
Или пак, тактиката е во насока ако референдумот успее, токму преку пратениците да се избоксува тоа што на ВМРО-ДПМНЕ не му успеа на лидерските средби, односно амнестија преку измени на Кривичниот законик кои се однесуваа на застарување на делата.
