Државната комисија за спречување на корупцијата која почна да работи пред околу еден месец е затрупана со претставки од граѓани од цела Македонија, кои ги разгледува на седници отворени за јавноста. Очигледна е реакцијата на граѓаните, нивниот голем интерес, но и очекувањата од новите борци против корупцијата и непотизмот.
Во една просторија, од дваесетина квадрати седумте антикорупционери кои секоја претставка ја разгледуваат поединечно, со часови додека трае отворената седница се под опсада на новинари, камери, камермани, од дваесетина редакции.
Новинарите, стоечки зошто нема место за сите, или во своите тефтери в скут запишуваат забелешки, но едвај успеваат да чујат какви одлуки се носат на седницата на Државната комисија за спречување на корупцијата зошто работната просторија не е соодветно опремена.
Фотографиите и видеото направени на вчерашната седница сведочат како изгледа еден работен ден во Антикорупциска која е во очекување да се пресели во нови простории во објект преку Вардар до МНР, наскоро.
