Демократската унија за интеграција останува на ставот дека Република Северна Македонија има потреба од институција што ќе биде фокусирана на борба против корупцијата на високо ниво во политиката. Тоа е барање на Европската Унија, тоа е барање на граѓаните, и со таков став ќе се претставиме на лидерската средба.
Ова денеска го изјави вицепремиерот за европски прашања Бујар Османи, по завршување на панел дискусијата „Националните перспективи на крајот на романското и во очекување на финското претседателство со Советот на ЕУ“, што се одржа денеска во Министерството за надворешни работи.
– ДУИ ќе бара да почне да се реализира иницијативата за ветинг. Сметаме дека тоа е неопходно доколку сакаме враќање на довербата во институциите од страна на граѓаните, но и од страна на институциите на ЕУ и ќе бара да се исполнат сите прашања што ќе ни го отворат патот за добивање датум за почнување на преговори со Унијата – рече Османи.
Во врска со новоотворениот случај на Јавното обвинителство „рекет“, Османи, говорејќи во името на партијата, рече оти ДУИ е разочаран од тоа што се случи вчера.
– ДУИ е најголем непријател на селективната правда, и доколку ги следите обраќањата на лудерот Али Ахмети ќе видите дека во секој говор селективната правда е како канцер на општеството, затоа ДУИ го предложи законот за ветинг и во политиката и во судството, и кај сите носители на јавните функции – рече Османи.
Тој додаде дека институциите треба да истражат точно што се случило, која било позадината, и кои биле реперкусиите, посочувајќи дека ДУИ останува на ставот дека земјава има потреба од инститиција што ќе биде фокусирана на борбата против корупцијта на високо ниво во политиката.
